Sejdiu: Fatkeqësisht asnjë zyrtar serb nuk ka kërkuar falje për krimet në Kosovë

Mitrovicë, 24 mars - Presidenti Fatmir Sejdiu tha se sot në Mitrovicë se është për keqardhje se asnjë zyrtar serb nuk ka kërkuar falje për krimet në Kosovë. "Fatkeqësisht deri më sot asnjë burrë shtetas i Serbisë, madje as ndokush nga këta që po vetëcilësohen si demokratë e properëndimorë, e lëre me ata që i nxitën dhe i kryen gjithë ato krime të turpshme, nuk denjoi të merrte guximin për t'i kërkuar falje popullit të Kosovës për gjenocidin e hapur që bënë ndaj nesh". Ky akt, tha Presidenti Sejdiu, sado që nuk do ta shuante dot dhembjen e përgjithshme për njerëzit e vrarë, si dhe për ata dy mijë qytetarë të zhdukur, të cilët Serbia ende nuk gjen forcë t'i dorëzojë, "ndoshta do ta lehtësonte sadopak udhën e krijimit të një fryme të re në marrëdhëniet tona ndërshtetërore si dy vende të pavarura e sovrane".