Sejdiu: Kosova është unike dhe nuk do të ndahet

“Kosova është unike dhe ajo nuk do të ndahet”, ka thënë presidenti Fatmir Sejdiu për Zërin e Amerikës, duke shtuar se “Kosova do të ketë një mbështetje të vazhdueshme në proceset e mëtejshme dhe jemi shumë të bindur se procesi i njohjeve të mëtejshme do të vazhdojë”.
Për këtë, Sejdiu ka thënë se “ka marrë inkurajim të jashtëzakonshëm edhe nga presidenti amerikan Gjorgj Bush, se do ta ketë parasysh këtë, dhe maturinë që Kosova ka pas deri tash, dhe se do të angazhohet në një vijë të bashkëpunimit edhe ndërkombëtar, në mënyrë që çështja e Kosovës të merret si cilësi e saj e veçantë, apo e karakterit "sui generis", që nuk mund të interpretohet në forma të tjera, në bazë të pretendimeve që ka dikush tjetër.
“Serbia është ajo që ka bërë krimin në Kosovë, ajo që ka planifikuar vrasjen me paramendim të një populli të tërë, dhe kundër saj janë marrë edhe ndërhyrjet ndërkombëtare, si ai i domosdoshëm i NATO-s, i vitit 1999”, ka thënë mes tjerash presidenti Sejdiu.